50 anos despois, Peugeot volve a bater marca con motor diésel O novo Peugeot 208 BlueHDi percorreu 2152 km con só 43 litros de gasóleo, o que supón, de media, un consumo de 2,0 l/100 km.
Peugeot ten unha longa tradición no desenvolvemento de motores diésel. Desde 1921 a marca francesa aposta por esta tecnoloxía, e dende 1959 practicamente todas as gamas do fabricante francés dispoñen de polo menos un motor Diésel.
A diferenza de hoxe, naquela época os diésel eran afumados, pouco refinados e dunha fiabilidade algo dubidosa. Para demostrar que era posible que un coche con motor diésel fose competente e rápido, a marca lanzou un prototipo baseado no Peugeot 404 Diesel pero cun só asento (imaxe abaixo).
Foi con este prototipo co que Peugeot acadou 18 novos récords mundiais, dun total de 40 récords, era 1965. Polo tanto, hai exactamente 50 anos.
Quizais para marcar a data, avanzando ata a actualidade, Peugeot volve bater récord, pero agora cun modelo de produción en serie: o novo Peugeot 208 BlueHDI.
Equipado cun motor 1.6 HDi de 100 CV, sistema start&stop e caixa de cambios manual de cinco velocidades, o modelo francés foi conducido durante 38 horas por varios condutores que ían ao volante en quendas de ata 4 horas cada un. ¿Resultado? A consecución do récord de maior distancia percorrida con só 43 litros de combustible, un total de 2152 quilómetros a unha media de 2,0 litros/100 quilómetros.
Segundo a marca, o Peugeot 208 BlueHDI utilizado nesta carreira era totalmente orixinal, equipado cun alerón traseiro para mellorar a aerodinámica e a adopción de pneumáticos de baixa resistencia Michelin Energy Saver+, semellantes aos que se atopan nesta versión. Non obstante, hai que ter en conta que esta proba realizouse en circuíto pechado.
Para acreditar a veracidade dos resultados, a supervisión da proba foi realizada pola Union Technique de l'Automobile, du motocycle et du Cycle (UTAC). Volvendo ás condicións reais, en termos oficiais, o Peugeot 208 BlueHDI ten un consumo homologado de 3l/100km e 79 g/km de emisións contaminantes (CO2). A renovada xeración do 208 chegará ao mercado en xuño deste ano.
Asegúrate de seguirnos en Facebook e Instagram