Citroën presentará no Salón de París un novo prototipo da liña DS: o DS Divine. Un concepto que introduce ao mundo na nova dirección estilística da liña premium da marca francesa.
Apostando por reforzar os argumentos da liña DS fronte ás referencias premium alemás, Citroën vén de presentar as primeiras imaxes do DS Divine Concept. Un modelo que, en palabras do director de DS, Yves Bonnefont, pretende asumirse como un coche adiantado ao seu tempo con "tecnoloxías visibles, sofisticadas e unha combinación de confort e dinámica moi equilibrada". Segundo Bonnefont, o DS Divine é unha representación do que ofrecerá a liña DS no futuro, "superficies cun aspecto musculoso e voluptuoso, marcado por liñas arrugadas pero fluídas".
Un dos principais detalles das liñas do DS Divine é a ausencia da luneta traseira, substituída por formas xeométricas. A falta de xanela traseira, a marca francesa optou polo sistema de cámaras de visión traseira cada vez máis habitual. Dubidamos de que esta solución chegue á produción, non obstante lembramos que Citroën ten unha longa historia de solucións estilísticas con pouco consenso. Abrir a porta a tesoira será outro elemento que, sen dúbida, non pasará da fase de Concepto.
