Hyundai Motor Group prepárase para inaugurar, en Corea do Sur, estacións de carga rápida para os seus coches eléctricos, denominadas E-Pit.
Estas estacións de carga rápida inspiráronse, segundo Hyundai, nas paradas en boxes da Fórmula 1, onde en tan só uns segundos equipos de mecánicos poden cambiar os pneumáticos dos monoprazas, nunha especie de "baile" sincronizado onde cada elemento coñece , de seguro, cal é a súa función.
O fabricante surcoreano inspirouse neste momento nas carreiras de Fórmula 1 e aplicou un concepto similar ás súas estacións de carga eléctricas, que estarán equipadas con cargadores rápidos cunha capacidade de carga de 800 V.
Nun E-Pit, os propietarios dun coche eléctrico Hyundai ou Kia compatible con esta potencia de carga poden recuperar 100 km de autonomía en só cinco minutos, e o 80% da capacidade da batería pódese recargar en só 18 minutos.
Só este mes de abril, Hyundai pretende instalar 12 destas estacións futuristas noutras tantas áreas de servizo de autoestradas de Corea do Sur, onde tamén prevé instalar oito estacións máis a finais de ano.
Cando estas 20 estacións estean listas, haberá 72 cargadores dispoñibles. Pero este é só o comezo, xa que a estas seguirán oito estacións máis en zonas urbanas, cun total de 48 cargadores adicionais.
Non hai, ata agora, ningún indicio de que este concepto de E-Pit poida recrearse en máis países no futuro. Só se sabe que o Hyundai IONIQ 5 e o Kia EV6 serán os primeiros coches en aproveitar estas estacións de carga rápida que, segundo informa The Korea Times, tamén terán unha aplicación asociada para que o pago se poida facer exclusivamente co teléfono intelixente.