Marka italiane kapërceu për herë të parë barrierën e 8000 njësive dhe arriti fitime neto prej 400 milionë euro.
Ka qenë një vit i mrekullueshëm për Ferrarin. Marka italiane shpalli dje rezultatet për vitin 2016, dhe siç pritej, arriti rritje në shitje dhe fitime në krahasim me 2015-ën.Vetëm vitin e kaluar u larguan nga fabrika e Maranello 8014 modele, një rritje prej 4.6% krahasuar me një vit më parë. Sipas shefit ekzekutiv të Ferrarit, Sergio Marchionne, ky rezultat është për shkak të suksesit të familjes së makinave sportive V8 – 488 GTB dhe 488 Spider. “Ishte një vit i mirë për ne. Jemi të kënaqur me progresin që kemi pasur”, thotë biznesmeni italian.
VIDEO: Ferrari 488 GTB është "kali" më i shpejtë në Nürburgring
Nga 290 milionë euro në vitin 2015, Ferrari ka realizuar fitime neto prej 400 milionë euro vitin e kaluar, duke përfaqësuar një rritje prej 38%. Tregu EMEA (Evropa, Lindja e Mesme dhe Afrika) mbetet më i popullarizuari, i ndjekur nga kontinentet amerikane dhe aziatike.
Për vitin 2017, synimi është të kalojmë shifrën e 8400 njësive, por pa shtrembëruar ADN-në e markës. “Ne vazhdojmë të jemi nën presion për të prodhuar një SUV, por është e vështirë për mua të shoh një model Ferrari që nuk ka dinamikën që është karakteristike për ne. Duhet të jemi të disiplinuar për të mos degraduar markën”, komentoi Sergio Marchionne.
Burimi: ABC